شاب ذو أحساس عالى أستطاع خلال فترة وجيزة أثبات موهبته فى التمثيل ، قام بالتمثيل فى الكثير من المسرحيات والأفلام القصيرة والتى نالت على أعجاب وثقة الجمهور وعرض له الكثير من الأفلام القصيرة فى المهرجانات الهامة فى الخارج وتوقع له الكثير مستقبل باهر فى التمثيل وحصل على العديد من الجوائز سواء فى التمثيل أو فى الفن التشكيلى الذى يعشقه ، يحلم بالعالمية والحصول على جائزة أوسكار أو حتى الترشيح لها فى يوم من الأيام ، أنه الممثل الشاب شريف الخيام وفى حديث خاص لبحلقة سألناه وكان الحوار كالتالى :
من هو شريف الخيام الذى لا يعرفه الكثير عن قرب ؟
شريف الخيام هو حاصل على بكالوريوس فنون تطبيقية 2002 قسم ديكور وخريج قصر السنيما وبحب التمثيل جدا وحصلت على عدد من الورش فى التمثيل ومنها مع الفنان " فادى مبادر " الذى يقوم بتدريس التمثيل فى نيويورك وذلك فى نقابة الصحفيين وورش أخرى فى التاون هاوس وفى أستديو عماد الدين وقمت بتمثيل عديد من المسرحيات والأفلام القصيرة وبالأضافة ألى تصميم الديكور الخاص لعروض ومسرحيات كثيرة ومرشح لاكثر من عمل هيكون مفاجئة بأذن الله .وعندى هوايات أخرى كتير بجانب التمثيل ومنها السباحة وركوب الخيل والرماية والألعاب المائية وبحب الموسيقى الكلاسيكى وبعشق الفن التشكيلى وحصلت على عدة جوائز فى أكثر من معرض للفن التشكيلى .
إزاي كانت بداية الموهبة عندك؟
أفتكر وأنا فى أعدادى كنت بعزف مزيكا على أورج صغير جدا ولما كبرت جالى أورج هديه من واحد صاحب والدى وأتعلمت عليه وأخدت لما كنت فى 3 ثانوى فى الآجازه كورس فى تربيه موسيقيه وكنت بعزف مع أصدقائى فى فرقه صغيره عملناها مع بعض وبعد كده لما دخلت الكليه أنتبهت لدراستى لان كليه الفنون التطبيقيه وقسم الديكور بالذات صعب وأنا كمان بحب القسم ده وبحب الديكور جدا وفعلا تفرغت لدراستى بس أول ما دخلت الكليه وأتعرفت على اصدقائى فشجعونى أنى أمثل وده لانى كنت بعمل فيهم شوية مقالب على سبيل التهريج بس كانوا بيصدقوا وكلمونى أدخل فريق الكليه للمسرح بس مكنش ينفع فى ظل الظروف الماديه والآسريه فى البيت عندى فأجلت الموضوع ده لحد ما أخلص دراستى .
أمتى كانت البداية الحقيقية ليك كممثل وايه وصفك للبدايه دي ؟
وأنا فى بكالوريوس جالى أسكربت مسرحيه أسمها " أحلام قرطاج " للمخرج محمد توفيق وكان صديق ليا من زمان وعرض عليا أعمل ديكور العرض ودى كانت أول مره أعمل فيها ديكور مسرحيه وعمرى ما كنت وقفت على خشبة مسرح وعملنا المسرحيه وأتعرضت فى مهرجان المسرح العربى فى سنة 2002 وفوجئت بأنى حصلت على مركز أول مع وجود منافسين أكثر قوه من معهد فنون مسرحيه وكنت أول مره أحس الآحساس اللى حسيته وأنا على خشبة المسرح عند أستلامى الجائزة وأفتكرت ساعتها كلام أصحابى أنى ممكن يكون عندى موهبة التمثيل ومش عارف ده أو مش متأكد وكان لازم أجرب وأعرف يمكن فعلا أكون ممثل فى يوم من الآيام وبعدها جالى شغل مع الفنان الجميل سعيد صالح فى مسرحية ( حلو الكلام مر الكلام ) كمهندس ديكور فى العرض ولكن الطريف أن فى يوم مكنش اللى بيمثل دور المصور موجود وعرضت عليهم بخوف أنى أطلع وأعمل الدور الصغير ده فوافقوا وطلعت وأنا ركبى بتخبط فى بعض قدام الفنان الكبير سعيد صالح والحمد لله أن كان فى قبول من الناس , وبعدها بدأت فى فرقة مسرحيه مستقله أسمها " فرقة مجانين المسرح " وكان مديرها الفنان ياسر حشيش والمخرج عمرو البحر وكان المخرج الجميل عمرو البحر هو أول من علمنى وفهمنى يعنى أيه تمثيل وأزاي اتحرك على المسرح والوقوف وأزاى ممكن أفكر فى الشخصيه وأتقمص الدور وكان مجهود كبير فى فترة سنتين ونص تقريبا فى المسرح مع فرقة مجانين المسرح وغيرها من الفرق المستقله الآخرى وفرق الهواه و قمت بعمل أكتر من مسرحيه مع عمرو البحر زي : المتلونين - الغضب - الجلسه السريه لجان بول سارتر - فيلم مش كارتون - عرض الفجوه بدار الآوبرا المصريه - معبد الوهم - جوه اللعبه وغيرها من عروض الدراما الحركيه ولكن كنت دايما بفكر فى السنيما وده كان بيزيد عندى أكتر كل ما اتفرج على الفنان الجميل الراحل أحمد زكى اللى أنا بعشق مدرسته فى التمثيل .
إزاي بدأ تحقيق حلمك فى السينما ؟
دايما كنت بحلم أكون ممثل سينما بس أزاى ده كان يحصل هو ده السؤال فالحمد لله ربنا وفقنى و كان فى يوم معايا صديق عمرى السينارست الفنان شريف المهدى وقالى أنه هيعمل فيلم قصير (أسمه بين يومين ) وأنه اختارنى أكون بطل الفيلم وأنا فوجئت بده وكان أول مره هقف قدام كاميرا حتى لو كانت هاند كام وكان الآصعب أن التمثيل صامت بمعنى أن في موسيقى طول الفيلم وأنا بعبر وبمثل بتعبيرات الوجه والجسم بس والحمد لله أتعرض الفيلم فى مهرجان جود نيوز لأفلام الموبايل وتم عرضه فى مهرجانات أخرى خارج مصر ونال أعجاب الجميع وبعدها توالت الآفلام مع شريف المهدى وغيره من المخرجين ومنهم فيلم ( لعنة ست ) من أخراج شريف المهدى وتم عرضه فى مركز الآبداع الفنى بدار الآوبرا المصريه ضمن مهرجان الملتقى الآول للسنيما العربيه والتلفزيون للدكتوره منى الصبان وتم عرضه فى مهرجان دبى بعد كده وبعدها بطولة مشاريع تخرج لطلبة فى أكاديمية الآستاذ رأفت الميهى ومن المخرجين اللى أشتغلت معاهم المخرجه مهيره والمخرج محمد نعيم وبعدها بطولة فيلم ( بعد الثامنه ) مع المخرج شريف المهدى والسينارست ياسمين سامى وبعدها بطولة فيلم (عايزين نمثل ) أخراج أسلام نور وهو مخرج حاصل على جائزة جود نيوز لأفلام الموبايل .
كلمنا عن تجربتك مع شركة العدل ؟
لقد فوجئت بأن هناك كاستينج فى شركة العدل جروب لأنتاج أول فيلم قصير لمحافظة مطروح وأسمه ( عندما تلمس الخيال ) وذهبت لهناك وعملت كاستينج والحمد لله تم وقوع أختيار المخرج أحمد عبد العليم علي لأقوم ببطولة الفيلم وقابلت الدكتور مدحت العدل ودي كانت أول مره أقابله رشحنى للبطوله وقمت بتصوير الفيلم مع الجميله ملك فاضل اللى قامت بدور زوجتى الآيطاليه فى الفيلم وكان دورى اكرم المخرج المصرى اللى عايش فى أيطاليا وراجع هو وزجته لمعاينة أماكن سياحيه وأثريه قديمه فى مطروح وسيوه والعلمين والساحل الشمالى ومارينا لعمل فيلم للوكاله فى أيطاليا وكانت أغنية الفيلم تأليف الدكتور مدحت العدل وأخراج الأستاذ أحمد عبد العليم وغناها هشام نور ونهال نبيل وقد نال الفيلم وأغنيتة والكليب جائزة أوسكار الفيديو كليب فى مهرجان الفيديو كليب فى الغردقه وقد شارك الفيلم فى مهرجان الآعلام العربى والمهرجان القومى للسنيما ومهرجان الآفلام الروائيه القصيره بالساقيه وتم أذاعتة وما زال يعرض على قنوات دريم والنيل تى فى .
وايه هى أعمالك بعد التجارب دي كلها ؟
بعدها قمت بتمثيل دور نبيل فى مسلسل عسكر وحراميه أخراج الآستاذ عبد العزيز السكرى وأتذاع على الآيه ار تى حكايات فى رمضان وكنت بلعب دور نبيل الشاب الغنى الثرى اللى بيدمن المخدرات واغلب مشاهدى كانت مع النجم طارق لطفى والنجمه أيمان رجائى وشريف عمر ثم كانت بطولة فيلم قصير أسمه ( قلب النار ) أخراج أحمد السعدنى وهو معيد بقسم التصوير الفوتوغرافى والسنيمائى بكلية الفنون التطبيقيه ,وكان ليا الشرف أشتغل طبعا معاه فى الفيلم ده وبعدين أشتغلت مذيع فى قناة ريد سى تى فى مع المخرج أحمد السعدنى لانه هو اللى رشحنى وعملت هنالك 3 برامج عن رمضان والطيران والعلاج الطبى هناك فى الغردقه والحمد لله لاقى أعجاب الناس وبعدها أعلان أتصالات جرين لاين مع مكتب الآستاذ الكبير شريف عرفه اللى نفسى اشتغل تحت أيده فى يوم من الآيام وبعدها برومو لقناة دليل الدينيه .
أوصفلنا تجربتك فى فيلم ساعتين فى يوم عادى ؟
من خلال عرض فيلمى ( عندما تلمس الخيال ) للعدل جروب قابلنى المخرج الجميل سامر الفاروق وكان بيعمل مساعد مخرج مع المخرجه الجميله أيناس الدغيدى والفنان الكبير محمد صبحى ودرس بقصر السنيما الآخراج وعرض عليا فكرة فيلم عايز يعمله وكان ليا الشرف أكون بطل من 3 ابطال فى فيلم ( ساعتين فى يوم عادى ) فى دور أدم اللى مش هقدر أنساه أبدا لأنه دور كان جديد عليا , والفيلم بيتم عرضه دلوقتي فى باريس فى المركز الثقافى المصرى الفرنسى وسيعرض بأذن الله فى أول مايو فى روما بايطاليا و الحمد لله كان تعليق عميد معهد السنيما عادل يحيى عليه جميل جدا وتحدث عن تفاصيله وتفاصيل شخصيتى وشخصيه مهره الخولى التى كانت تشاركنى البطولة .
ايه هى أخر أعمالك ؟
لسه مخلص عرض مسرحيه ( هيخصخصونا ) أخراج محمد عادل وكان دور لذيذ جدا وهو دور العسكرى الساذج الصعيدى وسيعاد عرضها مره أخرى بساقيه الصاوى... وقمت بتصميم وتنفيذ ديكورات عرض موسم القبعات للمخرج محمد محروس بالاضافة ألى تصميم وتنفيذ كليب (( مفاتيح غزه )) للمخرج شريف المهدى وللمطرب الجميل الفنان شريف عبد المنعم تضامنا مع غزه .
لسه مخلص عرض مسرحيه ( هيخصخصونا ) أخراج محمد عادل وكان دور لذيذ جدا وهو دور العسكرى الساذج الصعيدى وسيعاد عرضها مره أخرى بساقيه الصاوى... وقمت بتصميم وتنفيذ ديكورات عرض موسم القبعات للمخرج محمد محروس بالاضافة ألى تصميم وتنفيذ كليب (( مفاتيح غزه )) للمخرج شريف المهدى وللمطرب الجميل الفنان شريف عبد المنعم تضامنا مع غزه .
وياتري في أعمال جديده بتحضرلها؟
أنا عضو دلوقتي فى فرقة " الحريه المسرحيه " مع المخرج الجميل الآب الروحى لى بجد الآستاذ محمد عبد الحميد وأقوم بعمل بروفات على عرض ( محطة اتوبيس ) أعداد وأخراج الآستاذ محمد عبد الحميد ودورى هو على فى المسرحيه بجانب ديكورات العرض وهتتعرض المسرحية فى مركز الهناجر للفنون فى دار الآوبرا المصريه ضمن مهرجان المسرح المستقل يوم 26 /5 لحد يوم 2/6 بجانب أنى بحضر لبطولة فيلم قصير مع المخرج سامر الفاروق و بعمل بروفات على شخصيه فى مسلسل ست كوم و مرشح لدور فى فيلم الممثله اللبنانيه الجميله نور .
ايه هى احلامك المستقبيلة ؟
بحلم بالسنيما الطويله وبتمنى أكون عند حسن ظن الجميع وفى حلم تانى أنى حصل فى يوم من الأيام على جائزة أوسكار أو حتى أكون من المرشحين ليها .
ليست هناك تعليقات:
إرسال تعليق